Eldri fréttir 2007

Jólavörur í versluninni

Desember 2007

Það er margt áhugavert að skoða í versluninni í Þjóðmenningarhúsinu á aðventunni. Þar eru til dæmis til sölu bækur á ýmsum tungumálum um fróðleg efni, gjarnan tengd sýningum í húsinu. Auk þess hefur Þjóðmenningarhúsið haft til sölu Kærleikskúlu Styrktarfélags lamaðra og fatlaðra. Kúlan hefur verið tekin úr sölu þar sem sölutímabil er einungis 5. - 19. desember ár hvert. Fyrir jólin býður verslunin glæsileg handgerð kóngakerti til sölu eins og undanfarin ár. Einnig fæst sígild og þjóðleg tónlist, jólakort, póstkort, konfekt frá Hafliða í Mosfellsbakaríi og fleira í verslunni. Opið alla daga frá kl. 11 til 17.

Ný sýning í sýningaröðinni í verslun Þjóðmenningarhússins

3. desember 2007

Ný myndlistarsýning hefur verið sett upp í versluninni í Þjóðmenningarhúsinu. Að þessu sinni sýnir Erla Þórarinsdóttir verk sem hún kallar Sameign; opinber rými.

Hegningarhúsið, Alþingishúsið, Hnitbjörg, Kristskirkja, Háskólinn og Hallgrímskirkja eru sameignleg rými, viðmið okkar á önnur rými, hegðun okkar, verðmætamat og sjálfsímynd. Verkið samanstendur af sex málverkum af grunnflötum þessara opinberu bygginga í Reykjavík, máluð í skalanum 1:50. Erla tileinkar sýninguna Birgi Andréssyni sem til stóð að sýndi einnig í myndlistarsýningaröðinni í verslun Þjóðmenningarhússins en er nú fallinn frá.

Erla Þórarinsdóttir (f. 1955) á að baki glæsilegan feril sem myndlistarmaður. Hún hefur hlotið ýmsar viðurkenningar fyrir verk sín og sýnt á fjölda einka- og samsýninga hérlendis og víða um lönd.

Umsjónarmaður með sýningaröðinni er myndlistarmaðurinn Helga Egilsdóttir sem jafnframt er móttökufulltrúi í Þjóðmenningarhúsinu.

Móttaka í tilefni útkomu rits um síldarsögu Íslendinga

26. nóvember 2007

Út er komið ritið Silfur hafsins – Gull Íslands – Síldarsaga Íslendinga. Í verkinu er rakin saga síldveiða og vinnslu frá fyrstu tíð, sagt frá frumkvæði Norðmanna á 19. öld og síldarævintýrum Íslendinga á síðustu öld. Sagan er þriggja binda stórvirki í veglegri öskju, 1.104 blaðsíður í stóru broti með um 800 myndum og teikningum. Höfundar texta eru Benedikt Sigurðsson, Birgir Sigurðsson, Guðni Th. Jóhannesson, Hjörtur Gíslason, Hreinn Ragnarsson, Jakob Jakobsson, Jón Þ. Þór og Steinar J. Lúðvíksson. Ritstjórar eru tveir, Hreinn Ragnarsson og Steinar J. Lúðvíksson.

Í tilefni af útkomu ritsins bauð sjávarútvegsráðherra Einar Kristinn Guðfinnsson til móttöku í bókasal Þjóðmenningarhússins og veitti fyrsta eintaki bókanna viðtöku úr hendi Ernu Sörensen og Einars Matthíassonar eigenda Nesútgáfunnar sem gefur ritið út. Myndina tók Steingrímur Kristinsson.

Ráðstefna um Íslenska efnahagsundrið

16. nóvember 2007

Félagsvísindastofnun Háskóla Íslands, Samtök atvinnulífsins og Morgunblaðið ásamt fleiri aðilum stóðu að dagskrá undir yfirskriftinni Íslenska efnahagsundrið í bókasal Þjóðmenningarhússins 16. nóvember 2007.

Ráðstefnan var vel sótt enda var einn kunnasti hagfræðingur heims, prófessor Arthur B. Laffer, sem Laffer-boginn svonefndi er kenndur við, frummælandi á ráðstefnunni. Laffer setti ungur fram þá djarflegu kenningu að skattalækkanir gætu leitt til aukinna skatttekna ríkisins og fjallaði erindi hans um kosti skattalækkana. Setningarávarp flutti Árni M. Mathiesen fjármálaráðherra en prófessor Guðmundur Magnússon brást við erindi Laffers. Að því búnu fóru fram umræður og fyrirspurnir en lokaorð átti Ágúst Ólafur Ágústsson alþingismaður. Fundarstjóri var Ingimundur Sigurpálsson formaður SA.

Sjá nánar á slóðinni: http://skattamal.is/miracle/index.php?gluggi=forsida

Opnun sýningarinnar Ferðalok - um Jónas Hallgrímsson

15. nóvember 2007

Þess er minnst með ýmsum hætti um allt land að í ár eru liðin 200 ár frá fæðingu Jónasar Hallgrímssonar (1807 – 1845). Hér í Þjóðmenningarhúsinu var opnuð sýning kvöldið fyrir afmælisdaginn, dag íslenskrar tungu, og er þar fjallað um manninn, skáldið og náttúrufræðinginn Jónas.

Halldór Blöndal f.v. forseti Alþingis opnaði sýninguna og flutti ávarp. Fífilbrekkuhópurinn flutti þrjú lög Atla Heimis Sveinssonar við ljóð eftir Jónas og leikkonan Ragnheiður Steindórsdóttir las tvö ljóð eftir hann. Við opnunina afhenti einnig Sigurður Líndal, forseti Hins íslenska bókmenntafélags, Þorgerði Katrínu Gunnarsdóttur menntamálaráðherra og Halldóri Blöndal, formanni nefndar menntamálaráðuneytisins um 200 ára afmæli Jónasar Hallgrímssonar, eintök af bókinni Undir hraundranga, safn ritgerða um Jónas Hallgrímsson sem Sveinn Yngvi Egilsson ritstýrði.

Sýningunni var vel tekið af gestum við opnun hennar. Auk ágæts yfirlits um líf og störf Jónasar eru á sýningunni ýmsir fágætir munir sem sumir hverjir hafa ekki komið fyrir almenningssjónir áður. Má þar nefna safn steinasýna sem Jónas safnaði, með litlum handskrifuðum merkimiðum, og varðveitt er í Geologisk Museum í Kaupmannahöfn. Einnig talsvert af skjölum frá Japetusi Steenstrup sem var vinur og samverkamaður Jónasar um tíma. Handrit, teikningar og önnur gögn frá ferðum hans og Jónasar um Ísland eru á sýningunni og hafa ekki áður verið til sýnis hér á landi. Gögnin koma frá Zoologisk museum í Kaupmannahöfn. Einnig eru til sýnis frumteikningar sem dregnar voru upp að Jónasi látnum og þekktar teikningar af honum byggja á.

Sýningin er opin alla daga frá kl. 11 til 17 og stendur fram í júnímánuð 2008.

Händel á Ítalíu – kammertónleikar

14. nóvember 2007

Händel á Ítalíu var yfirskrift tónleika kammerhópsins Nordic Affect í Þjóðmenningarhúsinu þann 14. nóvember sl. Á tónleikunum kom hin þekkta sópransöngkona Susanne Rydén fram með NoA og fluttar voru m.a. veraldlegar kantötur eftir Händel auk óperuaría eftir Alessandro Scarlatti sem sjaldan hafa heyrst hér á landi. Susanne Rydén hefur á síðustu árum skipað sér í fremstu röð túlkenda barokk og klassískrar tónlistar og unnið með stjórnendum á borð við Nikolaus Harnoncourt, Joshua Rifkin og Christhopher Hogwood.

Tónleikarnir voru styrktir af Menningarjóði Reykjavíkurborgar, GLITNI og Radison SAS Saga hotel og eru liður í vetrartónleikaröð Nordic Affect í Þjóðmenningarhúsinu. Hópurinn er skipaður innlendum og erlendum hljóðfæraleikurum sem allir hafa lokið námi í flutningi tónlistar á upprunaleg hljóðfæri og hafa þau komið fram við mjög góðar móttökur á Íslandi og í Danmörku og Hollandi. Að þessu sinni skipuðu Nordic Affect þau Halla Steinunn Stefánsdóttir og Julia Fredersdorff barokkfiðluleikarar, Hanna Loftsdóttir barokksellóleikari, Karl Nyhlin lútuleikari og Guðrún Óskarsdóttir, semballeikari.

Réttarstaða Norður-Íshafsins rædd

9. nóvember 2007

Hafréttarstofnun Íslands hélt málstofu um réttarstöðu Norður-Íshafsins í bókasal Þjóðmenningarhússins föstudaginn 9. nóvember sl. Yfirskrift málstofunnar var Hver á Norðurpólinn? og var hún öllum opin meðan húsrúm leyfði. Málstofan hófs með ávarpi Ingibjargar Sólrúnar Gísladóttur utanríkisráðherra en að því búnu tóku eftirfarandi til máls um tilgreint efni: Ron Macnab, meðlimur Norðurskautsnefndar Kanada: The Central Arctic Ocean – Shrinking Ice and Expanding Jurisdiction. Jóhann Sigurjónsson, forstjóri Hafrannsóknastofnunarinnar: Fiskveiðar á norðurslóð við breyttar aðstæður. Douglas Brubaker, Fridtjof Nansen-stofnuninni: The Northern Sea Routes – Legal Considerations.

Að lokum fóru fram pallborðsumræður og fyrirspurnum var svarað. Þátttakandi í pallborði ásamt frummælendum var Trausti Valsson, prófessor í skipulagsfræði við Háskóla Íslands. Málstofustjóri var Tómas H. Heiðar, þjóðréttarfræðingur í utanríkisráðuneytinu, forstöðumaður Hafréttarstofnunar Íslands.

Opnun sýningarinnar Handan um höf

31. október 2007

Miðvikudaginn 31. október bauð Þjóðmenningarhúsið til opnunarhátíðar í tilefni nýrrar sýningar í bókasal, gamla lestrarsal Landsbókasafnsins. Sýningin nefnist Handan um höf – þýðingar og frumsamin ritverk Helga Hálfdanarsonar. Á sýningunni ber hæst þýðingar hans á sígildum bókmenntum; leikverkum, sögum og ljóðum, en einnig er sjónum beint að frumsömdum verkum þar sem hann túlkar forna texta og hugar að málrækt og öðrum mikilvægum málum. Sýningin leiðir í ljós hve víða þýðingar hans hafa ratað um leiksvið og ljósvaka og hve fjölmargir þeir eru sem hafa komið að uppsetningu, flutningi og útgáfu verka sem Helgi hefur þýtt.

Dagskráin við opnun var vegleg. Guðríður Sigurðardóttir forstöðumaður Þjóðmenningarhússins flutti ávarp um feril Helga, Dr. Gauti Kristmannsson flutti erindi sem hann nefndi Helgi Hálfdanarson - þýðandi þjóðarinnar og listamennirnir Arnbjörg Hlíf Valsdóttir, Ívar Örn Sverrisson, Bergþór Pálsson og Kristinn H. Árnason fluttu texta og tónlist úr verkum Helga. Dr. Sveinn Einarsson hafði umsjón með dagskránni og valdi texta til leiklesturs og upplesturs ásamt sönglögunum. Þess má geta að erindi Gauta birtist í Lesbók Morgunblaðsins laugardaginn 3. nóvember.

Bleikur október

Október 2007

Í októbermánuði er vakin athygli á brjóstakrabbameini hér á landi, áttunda árið í röð. Þetta er hluti af alþjóðlegu árveknisátaki og er bleik slaufa tákn átaksins.

Farið var að lýsa þekkt mannvirki erlendis í bleikum lit í októbermánuði árið 2000. Árið eftir tók Orkuveita Reykjavíkur að sér að kosta lýsingu á einu mannvirki á höfuðborgarsvæðinu, og árið 2007 lýsir Orkuveitan Viðeyjarstofu upp. Fleiri taka þátt í þessu átaki og nú í ár er Þjóðmenningarhúsið, meðal annarra bygginga, lýst með bleiku ljósi í október. Að auki bera allir starfsmenn Þjóðmenningarhússins bleika slaufu á barmi.

Þjóðræknisþing haldið í bókasal

3. október 2007

Þjóðræknisfélag Íslands hélt árlegt þjóðræknisþing sitt í bókasal Þjóðmenningarhússins í tengslum við aðalfund félagsins. Boðið var uppá vandaða dagskrá fyrir áhugafólk um samstarf milli Íslendinga heima og erlendis, og tengsl við fólk af íslenskum ættum utan Íslands. Á aðalfundinum var Guðríður Sigurðardóttir forstöðumaður Þjóðmenningarhússins kosin í stjórn félagsins. Formennska er áfram í höndum Almars Grímssonar sem setti þingið og kynnti þá sem fram komu.

Garry Oddleifson forseti Icelandic National League of North America flutti ávarp um störf félagsins. Bjarki Sveinbjörnsson flutti fróðlegt erindi um tónskáld af íslenskum ættum í Vesturheimi og í framhaldi af því stigu Erna Kirstín Blöndal söngkona og Örn Arnarson gítarleikari á stokk og fluttu nokkur lög. Því næst kynntu Ásta Sól Kristjánsdóttir, Ragnheiður Diljá Gunnarsdóttir og Hrafnhildur Sigmarsdóttir Snorraverkefnið. David Gislason minntist Jónasar Hallgrímssonar í tilefni af 200 ára fæðingarafmæli hans nú í nóvember. Að lokum flutti Neil Bardal ávarp.

Forsætisráðherra stóð fyrir móttöku fyrir þinggesti að dagskránni lokinni en auk þess bauð Þjóðmenningarhúsið gestunum að skoða sýningar hússins.

Kammertónleikaröðin Kristallinn hófst 22. september

24. september 2007

Hljóðfæraleikarar úr Sinfóníuhljómsveit Íslands hófu tónleikaröðina Kristalinn laugardaginn 22. september í bókasal Þjóðmenningarhússins. Fyrstu tónleikarnir í röðinni nefndust Brassbotninn og þar léku básúnu- og túbuleikarar listir sínar og spiluðu bæði verk sem samin eru fyrir þessa óvenjulegu og spennandi hljóðfæraskipan og alþekkta tónlist sem útsett er fyrir þennan dýpri enda málmblástursdeildarinnar. Brössurunum til halds og trausts var einn slagverksleikari.

Meðal verka sem flutt voru má nefna tokkötu og fúgu eftir Bach, kafla úr sjöundu sinfóníu Bruckner, Yesterday eftir þá Lennon og McCartney og Queen-smellinn Bohemian Rhapsody.

Kammertónleikaröðin fór vel af stað og næstu tónleikar verða haldnir 13. október og nefnast einfaldlega Hápunktur kammertónlistar. Leikinn verður oktett í F-dúr op. 166 eftir Franz Peter Schubert.

Myndlist á veggjum verslunarinnar í Þjóðmenningarhúsinu

13. september 2007

Í sumar var sett upp myndlistarsýning í versluninni í Þjóðmenningarhúsinu. Sýningin er sú fyrsta í röð myndlistarsýninga sem fyrirhugaðar eru og gera heimsókn í verslunina enn áhugaverðari en ella. Sýningin nefnist Manifesto – Momento: Benda og stendur hún fram í nóvember. Um er að ræða úrval svokallaðra Vísirósa sem listamennirnir Bjarni H. Þórarinsson (f. 1947) og Guðmundur Oddur (f. 1955) vinna saman.

Bjarni hefur langar myndlistarferil að baki sem frá árinu 1988 hefur tengst fræðum sem Bjarni fann upp og kallar sjónháttafræði. Um er að ræða nýstárlega aðferðafræði við myndgerð sem byggist á forni arfleifð, handritagerðinni. Að sögn Bjarna eru verkin rökrétt framhald þróunar þessarar arfleifðar; hann býr til myndrit en Vísirósirnar á sýningunni teljast allar til myndrita. Fyrst um sinn vann Bjarni allar Vísirósirnar í höndunum en frá árinu 1996 hefur Guðmundur Oddur unnið með honum að gerð þeirra með hjálp tölvu.

Þess má geta að í tengslum við sýningar á verkum sínum hefur Bjarni staðið fyrir fjölda sjónþinga.

Þeim sem hafa áhuga hafa á að eignast verk eða fræðast meira um þau vísindi sem Bjarni leggur þeim til grundvallar er bent á að hafa samband við listamanninn í síma 846-0933.

Menningarnótt: Stofutónleikar og opið hús

18. ágúst 2007

Aðalsteinn Ásberg Sigurðsson, skáld og tónlistarmaður, hélt árlega stofutónleika sína í bókasal Þjóðmenningarhússins á menningarnótt og var það í sjöunda sinn sem boðið er til slíkra tónleika, þar af fimmta árið í Þjóðmenningarhúsinu. Í ár var efnisskráin fjölbreytt að vanda og fluttir voru sagnadansar, þjóðlög, ljóð og vísnatónlist á þrennum tónleikum.

Að þessu sinni komu fram ásamt Aðalsteini Ásberg valinkunnir tónlistarmenn, þau Guðrún Gunnarsdóttir söngkona og sænska þjóðlagatríóið Draupner (sjá mynd), sem hefur í tvígang áður komið fram á menningarnótt í Reykjavík. Eins og nærri má geta voru tónleikarnir fjölskylduvænir og notaleg stofustemmning í fyrirrúmi.

Sýningar í húsinu voru fjölsóttar þann hálfa sólarhring sem þær stóðu opnar á afmælisdegi Reykjavíkur; menningarnótt 2007.

Tónaregn í Þjóðmenningarhúsinu

29. júní 2007

Dúóið para-Dís hélt hádegistónleika í bókasal Þjóðmenningarhússins föstudaginn 29. júní. Á efnisskránni var létt og sumarleg frönsk tónlist við allra hæfi. Enginn aðgangseyrir var að tónleikunum og nutu viðstaddir tónlistarinnar heilshugar.

Dúóið para-Dís skipa Hafdís Vigfúsdóttir flautuleikari og Kristján Karl Bragason píanóleikari. Þau starfa saman hjá Hinu húsinu í sumar sem skapandi hópur og kalla þau verkefni sitt Tónaregn í Reykjavík. Þau leitast við að koma fram á sem flestum og ólíkustum stöðum í borginni og eru tónleikarnir í Þjóðmenningarhúsinu liður í því. Fræðast má betur um tónleikaröðina á slóðinni www.blog.central.is/flautarinn.

Skólastjórar funda í Þjóðmenningarhúsinu

18. maí 2007

Menntasvið Reykjavíkurborgar hélt lokafund skólaársins með skólastjórum grunnskóla, skólastjórum tónlistarskóla, stjórnendum skólahljómsveita og aðstoðarskólastjórum í grunnskólum Reykjavíkur föstudaginn 18. maí í bókasal Þjóðmenningarhússins. Í lok dagskrár þáðu skólastjórarnir kynningu leiðsögumanns Þjóðmenningarhússins á nýrri sýningu Náttúrufræðistofnunar Íslands; Surtsey – jörð úr ægi og skoðuðu því næst sýninguna. Hún hefur fallið í góðan jarðveg hjá kennurum í grunnskólum sem hafa margir nú þegar komið að sjá sýninguna með sínum nemendum. Það var því kærkomið tækifæri að kynna Surtsey – jörð úr ægi skólastjórnendum og væntir Þjóðmenningarhúsið mikillar aðsóknar skólahópa á sýninguna.

Verðlaunaveiting Heimilis og skóla í bókasal

15. maí 2007

Foreldraverðlaun Heimilis og skóla 2007 voru afhent við hátíðlega athöfn í bókasal þriðjudaginn 15. maí sl.

Íþróttafélagið Grótta á Seltjarnarnesi hlaut verðlaunin að þessu sinni fyrir samræmingu skóladags og æfingatíma í samvinnu við bæjaryfirvöld og Grunnskóla Seltjarnarness. Auk Foreldraverðlaunanna sjálfra voru veitt tvenn hvatningarverðlaun og ein dugnaðarforkaverðlaun.

Aðalmarkmiðið með veitingu Foreldraverðlaunanna er að vekja athygli á því gróskumikla starfi sem unnið er á fjölmörgum sviðum í grunnskólum landsins. Við veitingu verðlaunanna er sérstaklega litið til verkefna sem hafa eflt samstarf foreldra og skólastarfsmanna og komið á uppbyggjandi hefðum í samstarfi þessara aðila.

Sýningin Surtsey – jörð úr ægi opnuð við hátíðlega athöfn

6. maí 2007

Sýning Náttúrufræðistofnunar Íslands Surtsey - jörð úr ægi var opnuð við hátíðlega athöfn sunnudaginn 6. maí. Guðríður Sigurðardóttir forstöðumaður Þjóðmenningarhússins og Jón Gunnar Ottóson forstjóri Náttúrufræðistofnunar ávörpuðu gesti við opnunina ásamt umhverfisráðherra Jónínu Bjartmarz sem lýsti sýninguna opna. Tónlistarflutningur var í höndum tríós Jóels Pálssonar.

Sýningin Surtsey – jörð úr ægi rekur myndunar- og þróunarsögu Surtseyjar fram til dagsins í dag og spáir fyrir um framtíð eyjarinnar og þróun lífríkis hennar næstu 120 árin. Á sýningunni er beitt nýjustu sýningartækni og margmiðlun við kynningu á ómetanlegum niðurstöðum vísindarannsókna í Surtsey. Henni er ætlað að höfða jafnt til forvitinna barna sem fræðimanna og þess er vænst að gestir skynji kraft eldsumbrotanna um leið og þeir fræðast um eðli þeirra og sköpunarverk.

Þann 5. júní nk. eru liðin 40 ár frá því eldgosi lauk í Surtsey en það braust upp á yfirborð sjávar 14. nóvember 1963. Íslensk stjórnvöld hafa tilnefnt Surtsey á heimsminjaskrá UNESCO og er niðurstöðu að vænta á árinu 2008.

Fjölmargir vísindamenn, hönnuðir, hugbúnaðarsmiðir og tæknimenn komu að undirbúningi sýningarinnar. Hún styðst m.a. við einstakar ljósmyndir og kvikmyndir sem teknar voru af Surtseyjareldum og í eynni frá upphafi og fram á þennan dag. Náttúrufræðistofnun Íslands stendur að sýningunni og hefur notið stuðnings fjölda stofnana og fyrirtækja til þess að ógleymdum ráðuneytum umhverfis- og menntamála. Gert er ráð fyrir að sýningin verði síðar flutt til Vestmannaeyja.

Meira um Surtsey á vef NÍ:

Surtsey tilnefnd á heimsminjaskrá UNESCO

Líffræðileiðangur til Surtseyjar 2006

40 ára vöktun eldfjalleyjar

Fjölskyldugaman á sumardaginn fyrsta

19. apríl 2007

Opið hús var í Þjóðmenningarhúsinu á sumardaginn fyrsta undir formerkjum Ferðalangs á heimaslóð:

Náttúrulífsmyndir Páls Steingrímssonar Þjóðin og náttúran voru sýndar viðstöðulaust allan daginn. Þessar hrífandi og nærgætnu stuttmyndir um hestinn, hundinn, selinn, gæsina, lundann og æðarfuglinn og sambúð þeirra við manninn ná til stórra og smáa og fjölmargir heimsóttu húsið til að njóta þeirra. Kvikmyndin verður sýnd áfram um tíma á afgreiðslutíma hússins, eða daglega frá kl. 11 til 17.

Auk kvikmyndasýningarinnar voru sýningarnar Handritin, Fyrirheitna landið og Berlin Excursion opnar öllum án aðgangseyris.

Þjóðskjalasafn Íslands 125 ára

3. apríl 2007

Safnið var stofnað með bréfi Hilmars Finsen landshöfðingja 3. apríl 1882 sem landsskjalasafn, en árið 1915 var nafni þessi breytt í Þjóðskjalasafn Íslands og um leið urðu breytingar á hlutverki þess. Í tilefni dagsins hélt Þjóðskjalasafnið alþjóðlega ráðstefnu í bókasal Þjóðmenningarhússins um starfsemi og vettvang þjóðskjalasafna. Ráðstefnan var öllum opin.

Tvennir tónleikar kvennakórsins Vox feminae

21. og 22. mars 2007

Kvennakórinn Vox feminae flutti íslensk söng- og þjóðlög á tvennum tónleikum í Þjóðmenningarhúsinu; miðvikudagskvöldið 21. og fimmtudagskvöldið 22. mars sl. Tónleikarnir voru all sérstæðir því söngperlurnar sem lifað hafa með þjóðinni gegnum aldirnar voru sungnar með leikrænni framsetningu. Útkoman var sönggjörningur og fylgdu áheyrendur kórnum eftir um ris og ganga hússins þar sem hinn einstaki hljómburður nýtur sín hvað best.

Á síðari tónleikum kom sænski dansarinn Ivonne Kral fram ásamt konum úr kórnum og stúlknakór Reykjavíkur og flutti frumsamið dansverk við tónlist sem maður hennar samdi að stærstum hluta. Sænski sendiherrann á Íslandi frú Madeleine Ströje-Wilkens var viðstödd við það tækifæri.

Kórinn hreif áheyrendur með sér og skapaðist bæði hátíðlegt og innilegt andrúmsloft á tónleikunum sem helgaðir voru formæðrum okkar.

Sýningin Icelandic Fashion and Design – inspired by nature var opnuð í Berlín

14. mars 2007

Sendiherra Íslands í Þýskalandi, Ólafur Davíðsson, opnaði sýninguna Icelandic Fashion and Design – inspired by nature í Felleshus, sameiginlegum sýningarsal norrænu sendiráðanna í Berlín, að viðstöddu fjölmenni þann 14. mars sl. Á sýningunni er meðal annars sýndur fatnaður eftir nokkra íslenska hönnuði sem einnig áttu föt á nýlega yfirstaðinni sýningu Þjóðmenningarhússins; Íslensk tískuhönnun. Þjóðverjinn Matthias Wagner K er sýningarstjóri sýninganna og dregur hann í uppsetningu sinni fram þau áhrif frá náttúru Íslands sem hann sér að endurspeglast í hönnuninni.

Við opnunina flutti Guðríður Sigurðardóttir forstöðumaður Þjóðmenningarhússins ávarp. Guðríður nefndi sérstaklega að sýningin Íslensk tískuhönnun hefði brotið blað í sýningahaldi Þjóðmenningarhússins með nýstárlegri og listrænni nálgun á afmörkuðum þætti íslenskrar nútímamenningar sem ekki hafði sést fyrr í sölum hússins og trúlega ekki annars staðar innanlands með þeim hætti sem þar var gert.

Þess má geta að Matthias Wagner K var einnig sýningarstjóri listahátíðarinnar Islandbilder sem íslensk stjórnvöld stóðu að í Köln í nóvember 2005 og voru verk íslensku fatahönnuðanna sýnd þar. Því má segja að þessi sýningaröð brúi bil milli menningarborganna Kölnar, Reykjavíkur og Berlínar og veiti ferskri og frumlegri íslenskri fatahönnun farveg um opinberar sýningargáttir hér heima og á meginlandi Evrópu.

Sýningar um Jónas Hallgrímsson

16. mars 2007

Miðvikudaginn 21. mars verður opnuð á Akureyri fyrsta sýningin af þremur um skáldið og náttúrufræðinginn Jónas Hallgrímsson í tilefni af 200 ára fæðingarafmæli hans en Jónas fæddist á Hrauni í Öxnadal 16. nóvember árið 1807.

Fyrsta sýningin verður í Amtsbókasafninu á Akureyri. Önnur sýningin um Jónas Hallgrímsson með áherslu á náttúru Íslands verður svo opnuð á Norðurbryggju í Kaupmannahöfn 3. ágúst n.k. og sú þriðja og síðasta hér í Þjóðmenningarhúsinu í nóvember.

Menntamálaráðherra skipaði nefnd til að undirbúa afmælishald á árinu 2007. Formaður hennar er Halldór Blöndal alþingismaður og aðrir í nefndinni eru Sigrún Jakobsdóttir bæjarstjóri, Páll Valsson rithöfundur, Margrét Eggertsdóttir prófessor og Jón G. Friðjónsson prófessor. Umsjónarmaður með dagskrá afmælisársins er Sveinn Einarsson en dagskráin er fjölbreytt með viðburðum hér heima og á slóðum Jónasar Hallgrímssonar í Kaupmannahöfn.

List og Saga ehf sér um hönnun, framleiðslu og uppsetningu sýninganna fyrir menntamálaráðuneytið. Sýningarhönnuður er Björn G. Björnsson.

Meðal sýningarmuna í Amtsbókasafninu á Akureyri eru allmörg eiginhandarrit Jónasar að ljóðum hans og ritsmíðum á sviði náttúrufræði og steinasýni sem Jónas safnaði á rannsóknarferðum sínum um Ísland á árunum 1837-42. Þar af eru fjögur sýni úr nágrenni Hrauns í Öxnadal sem voru sérstaklega fengin að láni frá Kaupmannahöfn. Sigrún Björk Jakobsdóttir bæjarstjóri opnar sýninguna, ávörp verða flutt og boðið upp á tónlistaratriði og léttar veitingar á eftir. Sýningin stendur fram í maí.

Bent er á vef Landsbókasafns Íslands - Háskólabókasafns um Jónas Hallgrímsson http://www.jonashallgrimsson.is/

Dómnefnd bókmenntaverðlauna Norðurlandaráðs skoðar handritin

5. mars 2007

Dómnefnd bókmenntaverðlauna Norðurlandaráðs tilkynnti um val á höfundi þeim er verðlaunin hlýtur í Norræna húsinu mánudaginn 5. mars. Nefndin kom síðar sama dag hingað í Þjóðmenningarhúsið og þáði leiðsögn um sýningu Árnastofnunar, Handritin. Á myndinni sést hópurinn ásamt fulltrúa alþjóðasviðs Alþingis sem skipuleggur heimsókn nefndarinnar hér á landi.

Þess má geta að verðlaunin falla að þessu sinni sænsku skáldkonunni Sara Stridsberg í skaut.

Tónleikar kammerhópsins Nordic Affect í bókasal

3. mars 2007

Laugardaginn 3. mars hélt kammerhópurinn Nordic Affect tónleika í bókasal, þá fyrstu í fyrirhugaðri tónleikaröð hópsins í Þjóðmenningarhúsinu.

Tónleikarnir báru yfirskriftina Girni og viður. Leikin var hljóðfæratónlist frá barokktímabilinu, allt frá hinum framúrstefnulegu strengjaverkum Marini og Merula til eins frægasta flautuverks sögunnar, h-moll svítunnar eftir J. S. Bach. Kammertónlist á sína tryggu aðdáendur hér á landi og var aðsókn að tónleikunum góð og flutningur tónlistarmannanna vandaður og líflegur.

Þess má geta að Nordic Affect eða NOA er fyrsti hérlendi kammerhópurinn skipaður fólki sem hefur sérhæft sig í flutningi tónlistar á upprunaleg hljóðfæri. Hópurinn var stofnaður árið 2005 af Höllu Steinunni Stefánsdóttur barokkfiðluleikara og Karl Nyhlin lútuleikara en telur í dag níu meðlimi. Hópurinn hefur komið fram á Norðurlöndunum, þ.m.t. á Sumartónleikum í Skálholti og Renaissance Musik Festival í Kaupmannahöfn og fengið góðar móttökur.

Reykjavíkurborg, Glitnir, Minningarsjóður Margrétar Björgólfsdóttur, Tónlistarsjóður og Menningarsjóður FÍH hafa veitt styrki til tónleikaraðarinnar.

Sýning Þjóðmenningarhússins -Íslensk tískuhönnun- brúar bil milli borga: Köln-Reykjavík-Berlín

26. febrúar 2007

Á sýningunni Íslensk tískuhönnun sem opnuð var í Þjóðmenningarhúsinu af forsætisráðherra Geir H. Haarde 29. júní 2006 sést að íslensku hönnuðurnir tíu, sem þar sýndu verk sín, sækja innblástur í náttúruna og andstæður hennar. Mýkt og harka, birta og myrkur, fínleiki og grófleiki endurspeglast í ögrandi og sjálfstæðri hönnun sem að margra mati er með því flottasta sem sést í heiminum í dag. Sýningin stóð til 27. febrúar.

Sýningin kom hingað til Reykjavíkur frá Köln þar sem hún hafði verið á listahátíðinni Islandsbilder í nóvember 2005, sem íslensk stjórnvöld stóðu að. Sýningin flyst aftur til Þýskalands, í þetta skipti til Berlínar. Þar ríkir nýsköpun í lista- og menningarlífi og ólgandi sköpunarkraftur íslenskra hönnuða mun eflaust njóta sín þar í borg.

Sýningarstjórinn Matthias Wagner K brúar bilið milli borganna og setur sýninguna upp á hverjum stað. Síðustu daga sýningarinnar hér í Þjóðmenningarhúsinu settu hönnuðurnir upp nýja fatalínu sem fylgdi sýningunni yfir brúna til Berlínar.

Sýningin verður opnuð í Felleshus, sameiginlegum sýningarsal sendiráða Norðurlandanna í Berlín þann 14. mars nk. og stendur til 3. maí. Þar verður hún hluti sýningar um íslenska tísku og hönnun því auk fatnaðar verða sýnd húsgögn og munir eftir íslenska hönnuði.

Sýningin braut blað í sýningarsögu Þjóðmenningarhússins því hún var fyrsta sýningin sem hér var sett upp og fjallaði eingöngu um afmarkaðan þátt í nútímamenningu á Íslandi. Óhætt er að segja að sýningunni hafi verið vel tekið. Bæði jók hún breidd gestahópsins sem leggur leið sína á sýningar hússins og textílmenntakennarar tóku henni opnum örmum og komu með nemendur sína til þess að skoða fatnaðinn, huga að því samhengi sem hann er sprottinn úr og vinna viðfangsefni út frá sýningunni í samvinnu við leiðsögumann hússins.

Þjóðmenningarhúsið gaf út einstaklega veglega sýningarbók með ljósmyndum af fatnaðinum sem sýndur var auk texta á þremur tungumálum, íslensku, ensku og þýsku. Fjallað er um fatnaðinn, hönnuðina og hugmyndina að baki uppsetningunni. Áhugafólki um tísku og hönnun er bent á að sýningarbókin verður áfram til sölu í verslun hússins á kostakjörum.

Þjóðmenningarhúsið þakkar sýningarstjóranum Matthiasi Wagner K og Sabine Schirdewahn hjá Agentur für Gute Gestaltung, Ruth Bobrich viðskiptafulltrúa hjá íslenska sendiráðinu í Berlín, Helgu I. Stefánsdóttur leikmynda- og búningahönnuði og bakhjörlum sýningarinnar Moch Figuren, Icelandair og Faco. Hönnuðunum tíu er þakkað fyrir þátttökuna og sitt framlag en þeir eru: Björg Ingadóttir og Vala Torfadóttir frá Spaksmannsspjörum, Ásta Guðmundsdóttir með ásta créative clothes, Þorbjörg Valdimarsdóttir, Rósa Helgadóttir, Anna Guðmundsdóttir, Dóra Emilsdóttir, Ragna Fróða, Jóna Björg Jónsdóttir með jbj design og Steinunn Sigurðardóttir með STEiNUNN merkið.

Safnanótt í Þjóðmenningarhúsinu

23. febrúar 2007

Safnanótt var haldin föstudagskvöldið 23. febrúar kl. 19 - 24 og Þjóðmenningarhúsið tók þátt með opnu húsi og ókeypis aðgangi ásamt skemmtilegri dagskrá við allra hæfi. Fjölbreytileikinn var í fyrirrúmi því dagskráin innihélt tísku, tónlistarflutning, náttúrulífskvikmynd og skriftir á kálfskinn að hætti miðaldaklaustra.

Nánar til tekið var um að ræða endurnýjun sýningarinnar Íslensk tískuhönnun – rétt áður en hún syngur sinn svanasöng, en hönnuðurnir færðu sýningargínurnar í það nýjasta, sumir þeirra fyrir opnum tjöldum á sjálfa safnanóttina. Sýningin verður svo tekin niður þann 27. febrúar. Ólöf Arnalds er upprennandi tónskáld, söngkona og hljóðfæraleikari og hún flutti verk af nýútkominni sólóplötu sinni á tvennum tónleikum um kvöldið. Framan af kvöldi gátu gestir reynt sig við skriftir í skrifarastofunni á sýningunni Handritin og allt til miðnættis gat öll fjölskyldan notið einlægrar og hrífandi nálgunar kvikmyndagerðarmannsins Páls Steingrímssonar á sambúð manns og dýra í íslenskri náttúru.

Safnanótt fór vel fram að vanda og kunnu gestir að meta það sem í boði var.