Eldri fréttir 2006

JÓLAHROLLUR í hádeginu

28. desember 2006

Annað árið í röð stóð Þjóðmenningarhúsið að upplestrardagskrá á aðventunni í anda hinna hrekkjóttu jólasveina; Jólahrollur í hádeginu. Höfundur eða staðgengill hans komu og lásu kafla úr nýútkominni spennusögu sinni. Lesturinn hófst kl. 12:15 alla dagana og nýttu margir gestanna sér súputilboð á veitingastofu Þjóðmenningarhússins.

Dagskráin var á þessa leið:
12. 12. Arnaldur Indriðason Konungsbók. Ingvar E. Sigurðsson las.
13. 12. Ævar Örn Jósepsson Sá yðar sem syndlaus er
14. 12. Stefán Máni Skipið
15. 12. Stella Blómkvist Morðið í Rockville. Ólafía Hrönn Jónsdóttir las.
16. 12. Bragi Ólafsson Sendiherrann
17. 12. Einar Hjartarson Nehéz
18. 12. Steinar Bragi Hið stórfenglega leyndarmál Heimsins
19. 12. Sigurjón Magnússon Gaddavír
20. 12. Árni Þórarinsson og Páll Kristinn Pálsson Farþeginn.
21. 12. Bjarni Klemenz Fenrisúlfur
22. 12. Jökull Valsson Skuldadagar
23. 12. Yrsa Sigurðardóttir Sér grefur gröf

Gaman er að nefna að Konungsbók sú sem bók Arnaldar Indriðasonar er nefnd eftir er engin önnur en Konungsbók Eddukvæða, handrit frá um 1270 sem sýnt er á sýningunni Handritin hér í Þjóðmenningarhúsinu. Af þessu tilefni kom Arnaldur sjálfur í húsið á Þorláksmessu og áritaði bók sína við borð sem stillt var upp í námunda við hina einu sönnu Konungsbók.

Glæsileg sýningarbók Icelandic Fashion - Íslensk tískuhönnun

14. desember 2006

Þjóðmenningarhúsið hefur gefið út glæsilega sýningarbók vegna yfirstandandi sýningar: Íslensk tískuhönnun. Þessi fallega yfirlitsbók um íslenska tískuhönnun er tilvalin jólagjöf fyrir áhugafólk um hönnun og tísku.

Á sýningunni Íslensk tískuhönnun er sýndur þverskurður tískuhönnunar í íslenskri nútímamenningu. Þrjátíu og átta úrvalsverk eftir tíu hönnuði sýna fjölbreytni og sköpunarkraft íslenska tískugeirans. Sýningarstjóri er þjóðverjinn Matthias Wagner K og kemur hann að uppsetningunni með hið næma auga gestsins og dregur fram sérkenni tískuhönnunar á Íslandi. Að hans sögn felast þau einkum í samþættingu andstæðna, áhrifum frá landslaginu og þjóðlegum hefðum og næmri tilfinningu fyrir tíðarandanum og lífsstíl þeirra sem klæðast fatnaðinum. Hönnuðurnir búa yfir listrænni fágun, fullkomnu valdi á tækni, frumlegri sköpunargáfu og næmi á fagurfræði.

Á sýningunni eru verk eftirtaldra hönnuða:

Anna Guðmundsdóttir
ásta créative clothes (Ásta Guðmundsdóttir)
Dóra Emilsdóttir
jbj design (Jóna Björg Jónsdóttir)
Path of Love (Ragna Fróðadóttir)
Rósa Helgadóttir
Spaksmannsspjarir
STEiNUNN (Steinunn Sigurðardóttir)
Þorbjörg Valdimarsdóttir

Matthias Wagner K og Guðrún Garðarsdóttir eru ritstjórar bókarinnar. Hún er til sölu hjá Þjóðmenningarhúsinu og hönnuðunum sem verk eiga í bókinni.

Kvennakórinn Vox feminae söng um allt hús

10. desember 2006

Kvennakórinn Vox feminae hélt vel heppnaða tónleika í Þjómenningarhúsinu í tilefni af útgáfu á þriðja geisladiski sínum, Ave María. Kórinn nýtti sér húsnæðið vel og söng á ýmsum stöðum. Þær hófu tónleikana á sýningunni Íslensk tískuhönnun á rishæðinni, fikruðu sig svo niður stigana og sungu á stigapallinum og enduðu sönginn inní hinum eiginlega viðburðasal, bókasalnum, þar sem Antonia Hevesi lék undir á flygil. Hanna Björk Guðjónsdóttir sópran söng með og Margrét J. Pálmadóttir stjórnaði.

Var það mál manna að tónleikarnir hefðu verið yndislegir enda lögin flest samin heilagri guðsmóður til dýrðar og hljómurinn einstaklega fagur í salarkynnum Þjóðmenningarhússins.

Dagskráin var haldin í samvinnu Vox feminae og Þjóðmenningarhússins.

Aldarminning Eysteins Jónssonar – málþing í Þjóðmenningarhúsinu

12. nóvember 2006

Börn Sólveigar Eyjólfsdóttur og Eysteins Jónssonar, þau Eyjólfur, Sigríður, Jón, Þorbergur, Ólöf Steinunn og Finnur, efndu til málþings í Þjóðmenningarhúsinu um ævi og störf Eysteins Jónssonar ráðherra, alþingismanns og formanns Framsóknarflokksins þann 12. nóvember sl. en hann hefði orðið 100 ára hinn 13. nóvember 2006.

Við upphaf málþingsins flutti Eyjólfur Eysteinsson ávarp herra Ólafs Ragnars Grímssonar, forseta Íslands. Þá fluttu ávörp Halldór Ásgrímsson fv. forsætisráðherra, Steingrímur Hermannsson fv. forsætisráðherra, Tómas Árnason fv. ráðherra, Vilhjálmur Hjálmarsson fv. ráðherra, Sigurður Markússon fv. formaður SÍS, Hjörleifur Guttormsson fv. ráðherra og Jón Sigurðsson viðskiptaráðherra og formaður Framsóknarflokksins.

Gerður Steinþórsdóttir cand. mag. stýrði málþinginu.

Afkomendur Eysteins og Sólveigar skemmtu gestum milli ávarpa, einkum með tónlistarflutningi.

Fjöldi mynda úr ævi Eysteins og Sólveigar var til sýnis á málþinginu og verða þær síðan til sýnis í Eysteinsstofu í Löngubúð á Djúpavogi, í safni til minningar um þau Eystein og Sólveigu.

Húsfyllir varð á málþinginu og að dagskrá lokinni gáfu gestir sér góðan tíma til að njóta kaffiveitinga og spjalla saman.

Börnum Eysteins Jónssonar og Sólveigar Eyjólfsdóttur langar að þakka öllum sem komu að málþinginu og gerðu það þeim ógleymanlegt.

Fjölskyldudagur á handritasýningu Árnastofnunar í Þjóðmenningarhúsinu - ókeypis aðgangur

4. nóvember og 2. desember 2006

Þjóðmenningarhúsið og Stofnun Árna Magnússonar í íslenskum fræðum stóðu fyrir fjölskyldudegi á sýningu Árnastofnunar, Handritin, þar sem kostur gafst á að kynnast skrifaraiðn miðalda af eigin raun.

Laugardagana 4. nóvember og 2. desember kl. 14 til 17 fengu börn og fullorðnir að meðhöndla það sem til þarf; fjaðurstafi gerða af flugfjöðrum álfta, gæsa og arna, bókfell úr kálfskinni og blek soðið af sortulyngi, mó og víðileggjum. Áhugasamir gátu skrifað með rúnaletri því sýnt er hvernig stafrófið okkar er skráð með rúnum.

Ofangreinda laugardaga var safnkennari Árnastofnunar í skrifarastofu handritasýningarinnar og veitti aðstoð og fræðslu sem alla jafna býðst skólahópum á virkum dögum. Enginn sem kann að draga til stafs er of ungur eða of gamall til að hafa gaman af kynnast þessari fornu iðn, um það geta þeir gestir sem nutu dagskrárinnar vitnað.

Skarðsbók postulasagna komið fyrir á handritasýningunni – athöfn af því tilefni

27. október 2006

Þess er nú minnst að 18. október voru liðin 40 ár síðan Jóhannes Nordal seðlabankastjóri afhenti íslensku þjóðinni Skarðsbók postulasagna sem íslenskir bankar höfðu keypt á uppboði í London. Af þessu tilefni hélt Stofnun Árna Magnússonar í íslenskum fræðum athöfn í bókasal Þjóðmenningarhússins föstudaginn 27. október sl.

Af sama tilefni var Skarðsbók postulasagna komið fyrir á handritasýningu Árnastofnunar hér í Þjóðmenningarhúsinu ásamt því að gefin var út ritgerð þar sem dr. Jóhannes Nordal segir frá tildrögum þess að handritið var keypt. Ritgerð Jóhannesar er prýdd fjölmörgum myndum úr Skarðsbók og er til sölu í safnbúð Þjóðmenningarhússins.

Guðríður Sigurðardóttir forstöðumaður Þjóðmenningarhússins og Vésteinn Ólason forstöðumaður Stofnunar Árna Magnússonar í íslenskum fræðum fluttu stutt ávörp við athöfnina. Auk þess flutti Ólafur Halldórsson handritafræðingur erindi um rannsóknir sínar á Skarðsbókar postulasagna.

Þjóðræknisþing haldið í Þjóðmenningarhúsinu

19. október 2006

Hið árlega þjóðræknisþing Þjóðræknisfélags Íslendinga var haldið í Þjóðmenningarhúsinu ásamt aðalfundi félagsins og móttöku fyrir þinggesti. Þetta var í þriðja sinn sem þingið er haldið í Þjóðmenningarhúsinu og er vilji til þess að samvinna hússins og Þjóðræknisfélagsins styrkist á komandi árum enda deila aðilar áhuga á kynningu og fræðslu um sögu og menningu Vesturíslendinga og ber nýlega undirritaður samstarfssamningur Þjóðmenningarhússins og Þjóðræknisfélagsins vitni um það.

Þingið hófs með ávarpi formanns, Almars Grímssonar, og því næst steig Stephan V. Benediktson í pontu og talaði um olíuiðnað en hann er eigandi og framkvæmdastjóri fyrirtækis í þeirri grein. Jafnframt talaði hann um tengsl sín við Ísland en Stephan er dóttursonur Stephans G. Stephanssonar. Þær Ásta Sól Kristjánsdóttir og Ragnheiður Diljá Gunnarsdóttir kynntu Snorra- og Snorri West ungmennaskiptaverkefnin og að því búnu flutti Jón Aðalsteinn Hermannsson tölu um vesturför Jóns Jónssonar frá Mýri. Hugurinn var hvíldur með tónlistarflutningi Önnu Sigríðar Helgadóttur og Reynis Jónassonar en þá fór Ólafur B. Thors yfir sögu Vesturfarasetursins, tíu árum eftir stofnun þess. Botninn var sleginn í þingið með afhendingu heiðursviðurkenningar Þjóðræknisfélagsins 2006 sem féll Vesturfarasetrinu í skaut.

Bókalist frá Berlín – sýning opnuð

17. október 2006

Sýning á bókum Berlínar-forlagsins Edition Mariannenpresse var opnuð við hátíðlega athöfn í bókasal Þjóðmenningarhússins 17. október. Með sýningunni sem kallast Berlin Excursion er boðið til skoðunarferðar um þann geira menningarlífs Berlínar sem getur af sér sérstæðar bækur, sannkölluð listaverk, því um er að ræða sérstaklega hannaðar bækur sem flestar eru unnar í samvinnu höfundar og myndlistarmanns og gefnar út í mjög takmörkuðu tölusettu upplagi.

Við opnunina fluttu Hr. Johann Wenzel sendiherra Þýskalands, Hannes Schwenger útgefandi Mariannenpresse og Guðríður Sigurðardóttir forstöðumaður Þjóðmenningarhússins ávörp. Á myndinni er Hannes Schwenger.

Ánægjulegt var að sjá við opnuna bæði myndlistarfólk og rithöfunda og aðra þá sem áhuga hafa á vandaðri útgáfu og hönnun og vonandi að sýningin bæti við blæ í litróf menningarlegra samskipta höfuðborganna Reykjavíkur og Berlínar.

Forseti norska stórþingsins skoðar sýningar

13. október 2006

Forseti norska stórþingsins, Thorbjørn Jagland, var hér á landi ásamt eiginkonu sinni í opinberri heimsókn í boði forseta Alþingis, Sólveigar Pétursdóttur. Komu þau við það tækifæri að skoða sýningar í Þjóðmenningarhúsinu.

Þjóðmenningarhúsið tók þátt í pólskri menningarhátíð

1. október 2006

Tvennir tónlistarviðburðir á pólskri menningarhátíð 28. september – 1. október fóru fram í Þjóðmenningarhúsinu á sunnudag.

Úrslit réðust í tónlistarsamkeppni sextán ungra tónlistarmanna sem komist höfðu áfram eftir áheyrnarpróf sem haldin voru í Tónlistarskóla Hafnarfjarðar. Til mikils var að vinna því sigurvegarinn, sem reyndist vera Snorri Hallgrímsson sem nemur gítarleik hjá Þórarni Sigurbergssyni við Tónlistarskóla Garðabæjar, fékk að launum ferð fyrir tvo með Heimsferðum til Kráká í Póllandi. Dómnefnd skipuðu virtir tónlistarmenn, þeir Adrzej Kleina fiðluleikari í Sinfóníuhljómsveit Íslands, Peter Maté píanóleikari og Martial Nardeau þverflautuleikari.

Við verðlaunaafhendinguna var leikinn píanókvintett nr. 1 eftir hið kunna pólska tónskáld Grazyna Bacewicz (1909-1969), en þetta var í fyrsta sinn sem verkið var flutt á Íslandi. Kvintettinn skipuðu Zbigniew Dubik og Ewa Tosik-Warszawiak á fiðlu, Svava Bernharðsdóttir á lágfiðlu, Pawel Panasiuk á selló og Örn Magnússon á píanó. Myndin sýnir hljóðfæraleikarana taka við lófaklappi að flutningnum loknum.

Úrslitatónleikarnir voru haldnir í samstarfi Ewu Tosik-Warsawiak, pólskrar menningarhátíðar og Þjóðmenningarhússins.

Um kvöldið voru jazztónleikar Jagodzinski tríósins. Tríóið skipa hinir mikilsmetnu tónlistarmenn (talið frá vinstri á mynd) Andrzej Jagodzinski píanóleikari, tónskáld og stofnandi hljómsveitar, Adam Cegielski kontrabassaleikari og Czeslaw Bartkowski trommuleikari. Tríóið ferðast heimshorna á milli og heillar unga jafnt sem aldna með einstakri túlkun sinni á verkum tónskáldsins Chopin. Þeir hafa nýlega gefið út nýja plötu í "Chopin" seríu sinni sem notið hefur vinsælda og viðurkenninga í heimalandinu og léku þeir af sannri list á tónleikunum í Þjóðmenningarhúsinu.

Tónleikarnir voru í samstarfi pólskrar menningarhátíðar, Jazzhátíðar Reykjavíkur og Þjóðmenningarhússins.

Háttsettir gestir frá Kína

21. september 2006

Chen Zhili, varaforsætisráðherra og æðsti yfirmaður mennta- og vísindamála í Kína heimsótti Þjóðmenningarhúsið þann 21. september. Ráðherrann og fylgdarlið skoðaði sýningar í húsinu með leiðsögn forstöðumanns og leiðsögumanns Þjóðmenningahússins og snæddi því næst hádegisverð í húsinu.

Samstarfssamningur Þjóðmenningarhússins og Þjóðræknisfélags Íslendinga

21. september 2006

Almar Grímsson stjórnarformaður Þjóðræknisfélags Íslendinga og Guðríður Sigurðardóttir forstöðumaður Þjóðmenningarhússins undirrituðu samstarfssamning Þjóðmenningarhússins og Þjóðræknisfélags Íslendinga fimmtudaginn 21. september. Markmið samkomulagsins er að auka fræðslu og kynningu á sögu og menningu íslenskra landnema í Vesturheimi. Til þess að ná þessu markmiði munu aðilar styðja við starfsemi hvors annars.

Myndbandstónverk Ólafar Arnalds Eins og sagt er tekið til sýningar

1. september 2006

Á dagskrá Þjóðmenningarhússins á menningarnótt var meðal annars sýning myndbandstónverksins Eins og sagt er eftir Ólöfu Arnalds. Nú hefur Þjóðmenningarhúsið tekið verkið til áframhaldandi sýningar vegna eindregins áhuga og eftirspurnar gesta.

Í verkinu flytur Ólöf frumsamda tónlist og syngur á átján tungumálum í níu myndrömmum samtímis svo úr verður alþjóðleg tónkviða.

Ólöf gerði heimildamynd um söfnun textanna í New York borg sumarið 2005. Þar tók hún viðtöl við fólk af ólíku þjóðerni og kynnti sér viðhorf þess til uppruna síns, tónlistar og móðurmálsins. Textarnir í verkinu eru í raun samdir af þessu fólki nema íslenski textinn sem er úr ljóði eftir föður Ólafar, Einar S. Arnalds.

Verkið var frumsýnt í Íslensku Óperunni í maí sl. sem útskriftarverkefni Ólafar í tónsmíði og nýmiðlum frá Listaháskóla Íslands. Ólöf flutti verkið síðar í Tjarnarbíói og Jónas Sen tónlistargagnrýnandi Morgunblaðsins skrifaði lofsamlega um verkið í Morgunblaðið 21. júní sl. Jónas lýsti verkinu meðal annars með þessum orðum: “Það var litríkt en fókuserað og skapaði mergjað andrúmsloft. Ég man ekki eftir neinu svipuðu á öllum mínum ferli sem gagnrýnandi. Óneitanlega var hugmyndin frábær.”

Heimilidarmyndin er sýnd viðstöðulaust ásamt myndbandstónverkinu og standa sýningar yfir í Þjóðmenningarhúsinu til og með 22. september næstkomandi.

Menningarnótt í Þjóðmenningarhúsinu

19. ágúst 2006

Þjóðmenningarhúsið stóð að glæsilegri dagskrá á menningarnótt og er hún tíunduð hér að neðan. Húsið stóð opið frá kl. 11 til 23 og auk sýninga og góðra veitinga voru tónleikar, myndbandstónverk, upplestur og sýnikennsla í boði fyrir þá fjölmörgu gesti sem heimsóttu húsið þennan dag.

Aðalsteinn Ásberg Sigurðsson, skáld og tónlistarmaður, hélt árlega stofutónleika sína í bókasal og var það í 6. sinn sem slíkir tónleikar voru á dagskránni. Ljóð og vísnatónlist var ráðandi á tónleikunum sem voru fernir talsins og aldrei eins, en alltaf fjölskylduvænir og efnið bæði gamalt og nýtt.

Á tónleikum kl. 16:00 og 17:00 komu Guðrún Gunnarsdóttir söngkona og Gunnar Gunnarsson píanóleikari fram ásamt Aðalsteini.

Á tónleikum kl. 18:00 komu þau Kristjana Stefánsdóttir söngkona og Sigurður Flosason saxófónleikari fram ásamt Aðalsteini og Gunnari Gunnarssyni.

Á tónleikum kl. 20:00 komu allir listamennirnir fram: Aðalsteinn Ásberg, Guðrún Gunnarsdóttir, Gunnar Gunnarsson, Kristjana Stefánsdóttir og Sigurður Flosason.

Kl. 11 - 23:

Eins og sagt er. Myndbandstónverk eftir Ólöfu Arnalds sýnt viðstöðulaust.

Í verkinu flytur Ólöf tónlist og syngur á átján tungumálum í níu myndrömmum samtímis svo úr verður alþjóðleg tónkviða. Ólöf var á staðnum og spjallaði við gesti og kynnti heimildaöflun sína og heimildamenn. Ath. Vegna áhuga og eftirspurnar verður verk Ólafar sýnt áfram til 22. september.

Kl. 16 – 18:

Íslensk tískuhönnun

Jóna Björg Jónsdóttir sem hannar og framleiðir jbj design fatalínuna var við á sýningunni og kynnti aðferðirnar sem hún notar við efnisvinnsluna. Jóna Björg hefur náð undraverðum árangri í þæfingu þar sem að hún notar ávallt ull og silki saman í fatnaðinn.

16:30 og 17:30:

Fyrirheitna landið

Lesið upp úr ferðasögu Þórðar Diðrikssonar sem tókst á hendur ferðalag frá Suðurlandi til Utah-fylkis á árunum 1855-1856 og settist að í fyrirheitna landinu.

Handritin - sýning Árnastofnunar

Hin einstæðu handrit, þjóðargersemarnar, á fallegri og fræðandi sýningu.

VERSLUN

Tilboð í verslun : 10% afsláttur af fjölskylduglösum

VEITINGASTOFA

Léttar menningarlegar veitingar, tilboð á vel smurðu brauði og drykkjum.

Góðir gestir að skoða Íslenska tískuhönnun

3. ágúst 2006

Guðríður Sigurðardóttir forstöðumaður Þjóðmenningarhússins tók á móti hópi kvenna sem fæst við handíðir og staddur var hér á landi í tilefni af því að margar þeirra áttu verk á textílsýningu sem sett var upp á Akureyri. Í hópnum voru meðlimir alþjóðlegra samtaka þeirra sem fást við þæfingu, vefnað, spuna, litun og útsaum. Textílútfærsla íslensku hönnuðanna hefur eflaust orðið þessum gestum innblástur því hún er afar nýstárleg og vönduð um leið og hún byggir á gömlum hefðum í iðninni.

Á myndinni eru Guðríður Sigurðardóttir forstöðumaður og Elaine Mehmet sendiherrafrú (Bretland) ásamt hópnum.

Þjóðmenningarhúsið var viðkomustaður Grikklandsforseta og föruneytis hans

7. júlí 2006

Á dagskrá opinberrar heimsóknar Karolos Papoulos Grikklandsforseta var heimsókn í Þjóðmenningarhúsið þar sem sýningar voru skoðaðar. Vésteinn Ólason forstöðumaður Stofnunar Árna Magnússonar veitti leiðsögn um Handritasýningu stofnunarinnar og Guðríður Sigurðardóttir forstöðumaður Þjóðmenningarhússins gekk með gestunum um sýninguna Íslensk tískhönnun ásamt hönnuðinum Steinunni Sigurðardóttur sem á verk á sýningunni.

Við sama tækifæri undirrituðu Valgerður Sverrisdóttir, utanríkisráðherra Íslands, og Theodoros Kassimis, aðstoðarutanríkisráðherra Grikklands, tvísköttunarsamning milli landanna.

Grikklandsforseti var hér á landi í boði forseta Íslands Ólafs Ragnars Grímssonar.

Sýningin Íslensk tískuhönnun opnuð með viðhöfn

29. júní 2006

Þjóðmenningarhúsið iðaði af lífi við opnunina á sýningunni þar sem sjá má þverskurð tískuhönnunar í íslenskri nútímamenningu. Forsætisráðherra Geir H. Haarde opnaði sýninguna og ræddi meðal annars ný menntunartækifæri sem íslenskum nemendum byðist nú í listrænni hönnun. Lýsti hann ánægju með að almenningi á Íslandi gæfist kostur á að sjá þessa sýningu í Þjóðmenningarhúsinu, en hann opnaði íslenska listahátíð í Köln á síðasta ári þar sem voru verk allra hönnuðanna sem nú sýna verk sín í húsinu. Forsætisráðherra fagnaði því hve íslenskir hönnuðir standa framarlega í grein sinni. Þakkaði ráðherra sýningarstjóranum Matthias Wagner K fyrir uppsetningu sýningarinnar og túlkun hans á íslenskri tískuhönnun þar sem lögð er áhersla á þætti sem okkur hafa ef til vill ekki verið augljósir, eins og sú tenging hönnunar og náttúru sem er samtvinnuð sýningunni. Hann fullvissaði viðstadda um að þeir ættu í vændum glæsilega sýningu í glæsilegum húsakynnum. Ávörp fluttu einnig forstöðumaður Þjóðmenningarhússins Guðríður Sigurðardóttir og sýningarstjórinn Matthias Wagner K sem bæði voru afar ánægð sem samvinnuna við alla þá sem að sýningunni koma. Ávarp Matthiasar er birt í heild sinni hér >>.

Viðstaddir skoðuðu að því búnu fatnaðinn og þá umgjörð sem hann er settur í á sýningunni við hjóminn af saxófónleik og gestaglaumi. Fullyrða má að almenn hrifning hafi ríkt meðal gestanna.

Í kjölfar opnunarinnar verður gerð sýningarskrá með texta og ljósmyndum af sýningunni.

Sjá nánari upplýsingar um sýninguna og hönnuðina sem þar eiga verk undir sýningar á forsíðu.

Hádegiserindi og sýningaropnun í bókasal

28. júní 2006

Á miðvikudaginn 28. júní hélt Sumarliði R. Ísleifsson sagnfræðingur hádegiserindi í bókasal Þjóðmenningarhússins í tilefni af opnun sýningar þar um skrif erlendra manna um Ísland og Íslendinga fyrr á öldum. Sýningin nefnist Í spegli Íslands og tekur til skrifa allt frá 16. öld. Sumarliði kallaði erindi sitt aftur á móti Carta Marina og ímyndir Íslands.

Carta Marina er Norðurlandakort eftir Svíann Olaus Magnus, gert í Róm á fyrri hluta 16. aldar og er eftirmynd þess á sýningunni ásamt fleiri Íslandskortum frá síðari öldum. Olaus Magnus dró ekki aðeins upp mynd af Norðurlöndunum heldur greindi frá ýmsu sem hann taldi sig vita um þau. Sumarliði skoðaði í erindi sínu þær hugmyndir sem Olaus hafði um Ísland, hvernig þessar hugmyndir hafa enst og hvort sjá megi þær í umfjöllun um Ísland í samtímanum. Jafnframt velti Sumarliði fyrir sér spurningunni um hvernig hugmyndirnar um Ísland urðu til.

Góður rómur var gerður að erindinu og spunnust nokkrar umræður um efnið. Að því búnu skoðuðu gestirnir sýninguna og þáðu veitingar.

Landsbókasafn Íslands – Háskólabókasafn setur sýninguna upp í bókasal og byggir hún á Íslandslýsingum, ferðabókum og myndum. Sýningin stendur til 13. ágúst nk.

Foreldraverðlaun Heimilis og skóla afhent í Þjóðmenningarhúsinu

16. maí 2006

Foreldraverðlaun Heimilis og skóla – landssamtaka foreldra, voru afhent við hátíðlega athöfn í risi Þjóðmenningarhússins. Þorgerður Katrín Gunnarsdóttir menntamálaráðherra afhenti verðlaunin sem þau Ingibjörg Einarsdóttir og Baldur Sigurðsson hlutu fyrir frumkvöðlastarf og óeigingjarna vinnu í þágu Stóru upplestrarkeppninnar. Myndinni hér til hliðar sýnir þau ásamt Maríu Kristínu Gylfadóttur formanni Heimilis og skóla og Þorgerði Katrínu Gunnarsdóttur menntamálaráðherra.

Auk Foreldraverðlaunanna voru veitt tvenn hvatningarverðlaun og ein dugnaðarforkaverðlaun. Sjá nánar um verðlaunin á heimasíðu Heimilis og skóla; www.heimiliogskoli.is.

Sýning um Snorra Hjartarson opnuð

22. apríl 2006

Sýning í minningu Snorra Hjartarsonar og lífsstarfs hans var opnuð við hátíðlega athöfn þegar 100 ár voru liðin frá fæðingu hans þann 22. apríl 2006. Rithöfundasamband Íslands sá um dagskrána við opnun þar sem Hjörtur Pálsson flutti erindi um skáldið, Þorleifur Hauksson og Ragnheiður Steindórsdóttir lásu kvæði eftir Snorra og Gunnar Guðbjörnsson og Jónas Ingimundarson fluttu sönglög við kvæði hans. Eins og nöfnin gefa tilefni til að ætla var um einstaklega vandaða og ánægjulega dagskrá að ræða sem hinir fjölmörgu gestir gerðu að góðan róm.

Sýningin ber titilinn Það gisti óður - Snorri Hjartarson 1906-2006 og að henni standa ættingjar Snorra Hjartarsonar í samvinnu við Þjóðmenningarhúsið.

Í tilefni tímamótanna kemur út ný heildarútgáfa á verkum Snorra Hjartarsonar hjá Eddu útgáfu.

Fjölskyldugaman á sumardaginn fyrsta

20. apríl 2006

Opið hús var í Þjóðmenningarhúsinu á sumardaginn fyrsta undir formerkjum Ferðalangs á heimaslóð:

Náttúrulífsmyndir Páls Steingrímssonar Þjóð og náttúra voru sýndar viðstöðulaust allan daginn. Þessar hrífandi og nærgætnu stuttmyndir um hestinn, hundinn, selinn, gæsina, lundann og æðarfuglinn eru til þess fallnar að þjappa fjölskyldunni saman og stórar og smáar fjölskyldur heimsóttu húsið til að njóta þeirra.

Auk kvikmyndasýningarinnar voru sýningarnar Handritin, Fyrirheitna landið og Þjóðminjasafnið - svona var það opnar öllum án aðgangseyris.

Tónleikar Kammerkórs Suðurlands með verkum eftir Gunnar Reyni

1. apríl 2006

Laugardaginn 1. apríl stóð Smekkleysa ehf að tónleikum í bókasal Þjóðmenningarhússins til heiðurs tónskáldinu Gunnari Reyni Sveinssyni en nýlega kom út geisladiskurinn Til Máríu með trúarlegum verkum eftir hann.

Flytjendur á tónleikunum voru félagar úr Kammerkór Suðurlands ásamt einsöngvurunum Hallveigu Rúnarsdóttur, Hrólfi Sæmundssyni og Önnu Sigríði Helgadóttur. Kári Þormar lék undir á píanó en þau ásamt Sverri Guðjónssyni eru einnig flytjendur tónlistarinnar á diskinum. Að auki lék Símon H. Ívarsson tvö lög eftir Gunnar Reyni á gítar.

Gunnar Reynir var að sjálfsögðu viðstaddur þessa heiðursstund ásamt fjölda gesta sem naut ljúfra tónsmíðanna í afar vönduðum flutningi listamannanna.

Safnanótt

24. febrúar 2006

Þá er hin mikla hátíð safna og sýningarsetra "safnanótt" að baki en föstudagskvöldið 24. febrúar voru sýningar vítt og breytt um borgina opnar frá kl. 19 - 01 og ókeypis inn.

Þjóðmenningarhúsið tók þátt í þessum viðburði með opnu húsi, huggulegum veitingum í veitingastofunni og tónlistardagskrá í hjarta hússins, bókasalnum. Þar stigu á stokk tónlistarnemar á lokastigi við Tónlistarskólann í Reykjavík og sungu og léku næturljóð eftir Mozart. Síðla kvölds komu fram listamenn sem hafa lifað sig inní andrúmsloftið við hirð Loðvíks XIV og fluttu þau barokk tónlist, sungu og stigu dans íklædd búningum tímabilsins.

Að auki var sérstök listsýning opnuð fyrr um daginn, eða kl. 17, þar sem getur að líta verk sem listamennirnir tengja við norðrið - ímyndir norðursins sem er yfirskrift mikillar ráðstefnu sem haldin var á vetrarhátíð og Þjóðmenningarhúsið tengdist með þessum hætti. (Sjá nánar undir “sýningar” á forsíðu). Ekki má gleyma því að skrifarastofa var rekin á handritasýningu Árnastofnunar hér í húsinu, þar sem gestum og gangandi gafst kostur á að reyna sig við skriftir með fjaðurstaf.

Ný sérvara til sölu í safnbúðinni

24. febrúar 2006

Þjóðmenningarhúsið kynnir með ánægju nýja sérvöru sem boðin er til sölu í safnbúðinni: Glös frá Stella design með hinni íslensku fjölskyldu sem þema. Serían heitir fjölskyldan mín og er gerð til að brjóta upp hversdagsleikann á heimilinu. Hönnuður sækir innblástur í þjóðbúninginn okkar, torfbæinn, kindina og sveitina fögru sem tengja okkur fortíðinni og rótum okkar. Glösin eru seld stök á kr. 840 eða í pari á kr. 1590 og fylgja fallegar umbúðir í líki torfbæjar glösunum.

Safnbúðin er opin á sama tíma og sýningar eða daglega frá kl. 11 til 17.

Sýningin Mozart-óperan á Íslandi opnuð á afmælisdegi tónskáldsins

27. janúar 2006

Þess er nú minnst um víða veröld að 250 ár eru liðin frá fæðingu Mozarts þann 27. janúar sl. Þjóðmenningarhúsið og Leikminjasafn Íslands tóku höndum saman um að minnast þessa merka tónlistarsnillings með sýningu í bókasal þar sem brugðið er upp mynd af sögu Mozart-óperunnar á íslensku leiksviði.

Við opnun sýningarinnar á sjálfan afmælisdaginn ávörpuðu Guðrún Garðarsdóttir f. h. Þjóðmenningarhússins og Jón Viðar Jónsson f. h. Leikminjasafnins gesti stuttlega. Að því búnu hófs dagskrá sem var á þessa leið: Halldór Hauksson fjallaði um óperur Mozarts og stöðu hans í óperusögunni og Sveinn Einarsson spjallaði um íslenskar uppfærslur á óperum tónskáldsins. Inn í spjall Sveins fléttaðist tónlist af geisladiskum og frábær flutningur einsöngvaranna Auðar Gunnarsdóttur og Ólafs Kjartans Sigurðarsonar á ýmsum brotum úr óperum Mozarts. Jónas Ingimundarson lék með á píanó.

Á sýningunni eru meðal annars búningar úr uppfærslum á Mozart-óperum, þar á meðal kápa Don Giovanni, hönnun Unu Collins, og á myndinni sést Ólafur Kjartan Sigurðarson grandskoða hönnunina ásamt fríðum flokki fljóða.

Nágrannar Halldórs Laxness í Nóbelsheimi

21. janúar 2006

Bekkurinn var þéttsetinn á dagskrá sem Árni Bergmann rithöfundur tók saman um þá rithöfunda sem voru samferða Halldóri Laxness upp á Nóbelsverðlaunapall á sjötta áratug síðustu aldar. Arnar Jónsson leikari las sýnishorn úr íslenskum þýðingum á verkum flestra verðlaunahöfundanna, þ.m.t. nokkur ljóð sem Árni þýddi af þessu tilefni.

Rithöfundarnir voru (fyrir utan Halldór): Bertrant Russel, Pär Lagerkvist, François Mauriac, Winston Churchill, Ernest Hemmingway, Juan Ramón Jimenéz, Albert Camus, Boris Pasternak og Salvatore Quasimodo.

Árni fjallaði um þá menningarstefnu og þau pólitísku sjónarmið sem birtast kunnu í vali Sænsku akademíunnar, ennfremur ræddi hann um rithöfundana sjálfa og hvað þeir höfðu helst til bókmennta að leggja sem og til þeirra mála sem helst brunnu á samtíðarmönnum þeirra. Einnig vék hann að tengslum Halldórs Laxness við suma þessa samferðamenn hans, einkum þá Hemmingway og Pasternak.

Nokkrar umræður spunnust um efnið að loknu erindinu enda varpaði Árni mörgum áhugaverðum flötum upp.

Veitingastofa Þjóðmenningarhússins, Matur og menning, sá um að gestum gafst kostur á að fá sér kaffihressingu og léttar veitingar á meðan á dagskránni stóð.

Efnt var til dagskrárinnar í tengslum við sýningu sem opnuð var í Þjóðmenningarhúsinu á Nóbelsdaginn 10. desember sl. í tilefni þess að þá voru fimmtíu ár liðin frá því að Nóbelsverðlaunin voru afhent Halldóri Laxness. Gljúfrasteinn – hús skáldsins setti sýninguna upp.