Sýningar í fundarstofum

Hringborðsstofan

Hringborðsstofu prýða málverk af íslensku landslagi eftir danska nítjándu aldar málara. Verkin eru úr stofngjöf til Listasafns Íslands en það var sett á fót í Kaupmannahöfn árið 1884 með verkum sem einkum danskir listamenn gáfu til stofnunar þess.

Verkin eru:

Við Þingvelli, 1872 eftir August G. Sciöth
Geysir, 1847 eftir C. F. Emanuel Larsen
Eyjafjörður, 1882 eftir Christian Blache
Geitá og landið í kring, 1871 eftir Frederik Theodor Kloss

Stofa Hannesar Hafstein

Hannes Hafstein (1861-1922) varð fyrsti ráðherra Íslands er þjóðin fékk heimastjórn 1904 og er einn af helstu stjórnmálaskörungum 20. aldar. Hann var einnig mikilsvirt ljóðskáld sem gjarnan orti krafti og karlmennsku lof. Á sýningunni getur að líta embættisskjöl sem tengjast ráðherraferli hans og muni sem minna á tímamóta framkvæmdir sem hann hafði forystu um. Þar eru einnig ljóðabækur Hannesar, tímaritið Verðandi sem Hannes var einn útgefanda að og ýmsir persónulegir hlutir úr fórum hans, svo sem innsigli, embættissverð, skemmtilegt danskort frá menntaskólaárunum, drykkjarmál frá Konungskomunni 1907 og margt fleira.

Stofa Jóns Sigurðssonar

Jón Sigurðsson forseti (1811-1879) var mikilvirkur og glöggur fræðimaður sem ruddi braut nýjum rannsóknum og var forvígismaður um útgáfu heimildarrita um sögu lands og þjóðar. Þekktastur er hann sem forystumaður í stjórnfrelsisbaráttunni á 19. öld. Fæðingardagur hans, 17. júní, er þjóðhátíðardagur Íslendinga. Á sýningunni getur að líta myndir og muni sem minna á líf hans og starf. Þar eru bækur og tímarit sem Jón gaf út, sendibréf og önnur skrif með eigin hendi hans, penni Jóns, blekstæði og ferðapúlt, innsigli hans með einkunnarorðunum “Eigi skal víkja”, silfurskjöldurinn með áletruninni frægu “Óskabarn Íslands, sómi þess, sverð og skjöldur” og margt fleira.

Tónlistarstofan

Sýning í tónlistarstofu bregður ljósi á íslenska tónlistarsögu með aðstoð ljósmynda, handrita, bóka og muna. Þar eru einkar falleg nótnaskinnblöð frá miðöldum, gamlar sálmabækur, handskrifaður Grallari og hljóðfæri eins og íslenskt langspil og flautur Sveinbjarnar Egilssonar. Einnig er þar að finna frumhandrit þjóðsöngsins “Ó, guð vors lands” með eigin hendi Sveinbjarnar Sveinbjörnssonar tónskálds. Ennfremur má sjá upptökutæki frá öndverðri 20. öld, ljósmyndir frá óperum og hljómleikum og margt fleira.

Leiklistarstofan

Á sýningu í leiklistarstofunni er brugðið upp svipmyndum úr íslenskri leiklistarsögu. Þar eru handrit að leikritum frumherja eins og Sigurðar Péturssonar, Matthíasar Jochumssonar og Indriða Einarssonar. Þar eru hinar heillandi leiksviðs- og búningateikningar Sigurðar Guðmundssonar málara auk leikbúninga frá honum. Ennfremur leikmundir og líkön af leikmyndum sem notaðar hafa verið á sýningum í Leikfélagi Reykjavíkur og Þjóðleikhúsinu auk ýmiss konar ljósmynda og prentmáls.